111111111

ايهما افضل الوردبريس ام البلوجر

من وجهة نظري المتواضعه مفيش حاجه اسمها وورد بريس احسن من بلوجر ف السيو وكمان مفيش حاجه اسمها بلوجر احسن من الوورد بريس ف السيو
الناس اللي بتقول كده ياريت لما يقولو اي معلومه تبقا عن تجربه وكمان من مصدر موثوق منه جدا لان في ناس مبتداه ممكن تشوف تعليقك ومتشتغلش ممكن يكون الشخص ده مفيش معاه فلوس للاستضافه ويكون حاطط ف دماغه انه يشتغل بلوجر ويشوف الكومنت بتاعك يتقفل ويتعقد ابسط حاجه هضرب مثال ع نفسي

ف البدايه مفيش معايا راس مال ولا اي كلام من ده يخليني اروح للورد بريس والاستضافة فكنت عامل حسابي اني ابدا بلوجر ولما كنت بشوف بوست مقارنه بين وورد بريس و بلوجر وابص ع الكومنتات الاقي ناس تقول بلوجر حقير وورد بريس احسن من بلوجر ف السيو وف التصدر ….. طب انا واحد عاوز ابدا موقع نضيف وكويس ويكون له اسمه طب بلوجر كده حقير زي ما البعض بيقول بس انا برده مفيش معايا فلوس للاستضافه ودوشتها… فكنت بقفل واتعقد من الشغل

لحد ما جيت ف يوم وتوكلت على الله وبدات بلوجر واخترت المجال واشتريت دومين ب 50 جنيه بس وقالب مجاني واشتغلت.. الكلام ده حوالي من 5 شهور
قرات كتير ف الجروب الاكثر من رائع ده وقرات ف المواقع واخدت خبره وكمان تجارب اثناء الشغل طب اي النتيجه دلوقتي
اولا موقعي مفيش فيه غير 11 موضوع بس بسبب ظروف شخصيه الحمدلله
معملتش ولا باك لينك لموقعي
الكلام اللي شغال عليه معدل بحث شهري حوالي 10 الاف عملية بحث
5 مواضيع منهم تصدر صفحه اولى ف الترتيب الاول متفوقا على مواقع وورد بريس شغاله طبعا من زمان وليها الاف الباك لينكات
2 مواضيع ظاهرين ف الصفحه الثانيه
باقي المواضيع تصدر صفحه اولى لا يقل عن الترتيب ال 3 او ال 4
منشرتش ولا موضوع واحد ف موقعي بقالي اكتر من شهرين والحمدلله المواضيع ف تقدم والزيارات كل يوم بتعلى طبعا مش اضعاف بس اهم حاجه انها مش بتنقص بسبب التحديث للمقالات
وكنت بقول هبدا بلوجر ولما اعمل فلوس احول وورد بريس بس الحمد لله هستمر على بلوجر ان شاء الله طول ما انا شغال شرعي مش خايف من حاجه
فلو انت لسه بتفكر تشتغل بلوجر ولا وورد بريس ومحتار ومفيش معاك راس مال وعاوز تبني موقع صدقني الاتنين كويسين واتوكل على الله وابدا واتعلم واقرا وكل نقطه تسمعها ف السيو وتكون جديده عليك ابحث عنها ف جوجل وافهمها وطبقها وصدقني الخبره هتكسبها ف التجارب الخبره هتكسبها ف التجارب وصدقني لو محتار تشتغل ف ايه .. اشتغل ف اي حاجه لو ده اللي منعك المهم تبدا وتاخد الخطوه وبعد كده هتلاقي المجالات قدامك كتير وسهله وهتابدع والسلام عليكم ورحمة الله

22222